BASERRITARRAK

“Baserritarrak” izeneko erakusketan gizonezkoek protagonismo berezia dute. Kapitain-etxeko sarreran sartu ahala, eskuineko paretan, bost gizonezko ikusiko ditugu, guztiek soinean brusak daramatzate. Horietako batzuk baserritar brusak dira, beste batzuk tratanteek, alegia, feriatan ganadu saltzaile gisa aritzen zirenenak. Brusak XX. mende hasierako jatorrizko jantzien erreplikak dira, guztiak Gipuzkoakoak, besteak beste; Beasain, Azkoitia eta Oiartzungo brusak.

Bost gizon horien atzealdean pareta osoa luze zabal hartzen duen lonan, XX garren mende hasierako argazki zuri beltza ikus daiteke. Hirian ateratako irudia da, erdialdean, gizon burges bat eta inguruan gizon baserritarrak. Argazkian ezin hobeto ikus daiteke, brusak nolakoak ziren, txapela nola janzten zuten, eta hiri zein herrira jaisten zirenean erabiltzen zituzten alpargatak.

Aurrez aurre, aretoko ezkerreko paretara begiratuz gero, denboran atzera egin eta Errenteriara, Xenpelar eta Biteri kaleen arteko bidegurutzera goaz. Bertan bederatzi emakume baserritar topatuko ditugu. Gipuzkoa (Legazpi eta Oiartzun), Bizkaia eta Nafarroako (Sakana) jantzien erreplikak daramatzate. Legazpiko jantziak jatorrizkoen erreplikak dira eta gainerakoak argazki eta irudi zaharretakoak.

Erakusketan baserritar jantziaren, gizonezko zein emakumezko jantziaren, pieza guztien deskribaketa eta XX. mende hasierako argazkiekin osatutako testuak daude. Horietan modu didaktiko batean pieza bakoitzaren funtzioa, zertarako zen, zein ehunetan josten zen, eta nola lotzen zuten azaltzen da.